Anjaano koh beech ek Apni Pari

By: Shital Shobhna Gounder

Ek Anjaane duniya mein kadam rakhne se pehle.

Anjaane chehro ko dekh kar dar se cheek cheek kar rone se pehle.

Main khoon mein latpat par sabhi ko meri taraf aakarshit hote dekhne se pehle.

Mujhe jaanna tha...Jaanna tha ki dar itna mujhe tha kyun lag raha jab hogi woh pari saath mere.

Nau mehino se jiski baatein mein sunti aayi.

Mere laat marne par bhi joh khushi se jhoom uthi.

Woh pari hogi toh uss anjane duniya mein apne dil koh yahi samjhati rahi.

Aayi woh ghadi woh pari dard se cheeki mein bhi sang dar se seham si gayi.

Aankhein meri jab khuli to thi mein ek anjane jahan mein,saamne theh kitne anjaane chehre.

Par tabhi meri nazar uss pari par padi,aur jab usne mujhe apne aachal mein chupa kar,pyaar seh thama phir dikhe hi nahi mujhe woh anjaane chehre.

Unke aachal mein tha sab kuch jaana pehchaana.Ek pal ko bhi unka nazaron se dur hona na tha humko gawara.

Ungli thaam chalna bhi usne sikhaya.Ladkharakar girne ke baad uthna bhi usne sikhaya.

Joh thi mere bachpan ka sahara.Umar sang badla yeh rishta bhi humara.

Saheli aisi thi ki na tha usse koi baat chupta.Salah aisi deti jisme hamesha tha meri bhalayi chupta.

Har tokhar lagne se pehle usne mujhko sambhala.Har ek katinai ka muskura kar saamna karna sikhaya. Ladki hoon main par duniya mein apni pehchaan banana sikhaya.Galat ke saamne datkar khada hona aur sahi ke saamne jukhna sikhaya.

Kabhi kabhi sochti hoon main ke hain kaun woh..kaha seh hai woh aayi..

Kya aasman seh uthri hai yeh meri pari..yah hazaro lakho taaro keh beech ka timtimata sitara hai yeh meri pari..

Shayad sach kehte hai log

Bhagwaan har jagah khud nahi ho sakte isiliye unhone maa ko hai banaya.

Haan maa hi to hai woh pari joh khud se pehle humari khushi ka karti hai khayal.Hai woh pariyon jaisi sundar aur laati hai humari duniya mein khushiya behshumar.